Naudetatane har rykt ut til ei trafikkulukke mellom ein bil og ein motorsykkel på Viksdalsvegen i Sunnfjord. To personar er involverte, føraren av motorsykkelen og føraren av bilen. Ulukka framstår som alvorleg, og luftambulanse er på veg til staden.

Naudetatane har rykt ut til Bømoen på Voss etter melding om ein fallskjermhoppar som skal ha falle ukontrollert mot bakken. Opplysningane er førebels ikkje stadfesta, og situasjonen er uavklart. Ressursar er på veg til staden.

Ein mann busett i Kinn kommune er ilagt besøksforbod mot to kvinner i ti månader, skriv Firdaposten. Forbodet gjeld fram til mars 2027 og er stadfesta av tingretten. Bakgrunnen er fleire valdshendingar, mellom anna ei melding om kroppskrenking som framleis er under etterforsking. Retten meiner det er ein reell risiko for at mannen kan utføre straffbare handlingar, forfølgje eller krenkje freden til den eine kvinna. Mannen har ikkje lov til å oppsøkje eller kontakte kvinnene, verken direkte, på telefon, gjennom meldingar eller via andre personar. Sjølv om mannen og den eine kvinna har eit felles barn, meiner retten at kontakt om samvær kan gå gjennom ein tredjeperson.

Det går føre seg ein redningsaksjon i Jotunheimen etter at ein person fall under klatring søndag morgon. Personen var del av eit turfølgje på to. Ulukka framstår som alvorleg, og både redningshelikopter, luftambulanse og Norske Alpine Redningsgrupper er involverte i aksjonen.

Ein ung gut er frakta til sjukehus etter eit slagsmål i Sæbøvik i Kvinnherad natt til søndag. Politiet fekk melding om hendinga i Sæbøvikvegen klokka 02.07. Den mistenkte hadde forlate staden før politiet kom fram. Guten var medviten og kunne snakke, men skadeomfanget er førebels ukjent.

Den undersjøiske Bjorøytunnelen i Bergen vart klokka 18.35 stengd etter melding om at ein mann som gjekk i tunnelen. Mannen i 20-åra skal sjølv ha ringt inn til politiet. Politiet har no kontroll på mannen og tunnelen er opna igjen.

Det vart klokka 18.35 sett i gang redningsaksjon i Øygarden der Hovudredningssentralen var kopla inn og alle naudetatar og luftambulansen deltok. Ein bebuar ved Straumsundet hadde varsla om å ha sett ein person i sjøen som verka som han held seg fast i ei bøye. Klokka 18.52 melde Vest politidistrikt at Luftambulansen har vore over området i nokre minutt utan å sjå noko til personen. Klokka 19.08 melder Vest politidistrikt at politibåten er ved den aktuelle bøya. Det er berre observert eit tau i tilknyting til bøya. Heller ikkje ein båt som var i området før aksjonen starta har registrert nokon person i sjøen. Ifølge politiet verka noko av forklaringa til innringaren ikkje truverdig. Aksjonen blir avblåst og alle etatar avsluttar.

Ein bilførar svinga for brått av i eit vegkryss ved Kjerrgardsvika på Askøy og tippa over på den eine sida. Uhellet skal ha skjedd med låg fart. Mannen i 80-åra var åleine og melde sjølv frå. Han er ute av bilen og skal ikkje vere skadd. Naudetatane er på staden. Bilen ligg på sida, midt i vegen. Bilbergar er bestilt. Det er ingen lekkasjar frå el-bilen.

I 16-tida var politiet med for å bistå helsevesenet som hadde rykka ut til ein pasient i Hardangervegen i Bergen. Ein overstadig berusa mann i 40-åra som kjenner pasienten, var på staden og hindra naudetatane sitt arbeid med pasienten, melder Vest politidistrikt. Han klarte ikkje å forklare kvar han bur, og blei vurdert til å vere ute av stand til å ta vare på seg sjølv. Han blei sett til av lege og deretter sett i drukkenskapsarrest. Mannen blir ikkje meld.

468 husstandar vart klokka 16.30 laurdag ettermidag råka av straumbrot på Knappskog og Geitanger i Øygarden kommune, melder BKK. Klokka 18.30 var straumen tilbake. I tillegg mista sju husstandar straumen på Titlestad i Fana klokka 17.45. Også der er straumen tilbake, etter at montørar har fjerna tre som låg over linja.

Ein motorsyklist køyrde ut av vegen i ein venstresving i ei 80-sone på riksveg 5 i Florø litt før 15.50. Føraren har smerter i ryggen. Ambulanse og politi er framme. Ulukka skjedde like vest for avkøyring til Botnavegen.

I retning Herøysund vest for Uskedalen i Kvinnherad har ein bil køyrd av vegen i ei 80-sone og sperrar eit køyrefelt, melde Vest politidistrikt klokka 15.34. Naudetatar er på staden. Tjue minutt seinare melde dei at bilen hadde snurra rundt og treft eit hus langs vegen. Sjåføren var åleine i bilen og skal ikkje vera skadd, men blir køyrd til legevakta på Husnes i ambulanse. Det er manuell dirigering på staden og bergingsbil er bestilt. I 16.30-tida opplyser Vest politidistrikt at bilen trefte grunnmuren på eit hus på motsett side av vegen. Det er ikkje opplyst om store skader på huset, og heller ikkje mistanke om ruskøyring. Ifølge politiet var det glatt veg på staden, på grunn av regn. Onsdag knuste ein annan bil inn i gjennom ein husvegg i Herand i Ullensvang.

Det er meldt om branntilløp i ein båt som ligg til kai på Askrova i Kinn kommune, like utanfor Florø. Brannvesenet er på veg til staden, og ein ambulansebåt er klar til å rykke ut. Saka er pågåande.

Ein gut som var sakna i Haukedalsområdet i Sunnfjord laurdag ettermiddag, er komen til rette etter ein større leiteaksjon. Ifølgje Firda vart fleire ressursar sette inn i søket, mellom anna eit redningshelikopter. Politiet opplyste klokka 14.01 at guten var funnen. Operasjonsleiar Dan Erik Johannesen seier til Firda at politiet valde å kalle ut store ressursar på grunn av omstenda, mellom anna fordi det var ei elv i nærleiken.

Politiet melder om fleire tilfelle av fulle mindreårige på festivalen Malakoff på Nordfjordeid. Like over klokka 17 melde ein vektar om ein berusa 17-åring inne på festivalområdet som bar på ei spritflaske. Han var sint og lite samarbeidsvillig og nekta å oppgi personalia. Guten må halda seg vekke frå sentrum til laurdag. Foreldra er varsla. Rett før klokka 19 fekk politiet melding om ein 14 år gamal gut som forsøkte å få med seg alkohol inn på festivalen. Han slo til ein vektar på staden, men ingen blei skadde. Han var saman med to jamnaldrande gutar. Dårleg oppførsel førte til at festivalarmbanda deira blei fjerna. Dei er henta av foreldra sine.

Strekninga Flå-Nesbyen er stengd for togtrafikk. Grunnen er straumproblem. – Det har vore mykje lyn og tore i området, så me har ikkje kunna fiksa problemet enda, seier Stine Strachen, pressevakt i Banenor. Det er uvisst når dei kan få retta feilen. Ho viser reisande til Vy. –Tipset til alle som skal reisa med tog er å sjekka Vy sine nettsider og Vy-appen for kva det har å bety for di reise. – Me erstattar toga med buss så lenge dette varar ved, seier Åge-Christoffer Lundeby, kommunikasjonssjef i Vy.