Miljøorganisasjonane må betale millionar etter tap i lagmannsretten

Naturvernforbundet og Natur og Ungdom fekk ikkje medhald i kravet om å stanse gruvedumpinga i Førdefjorden. No er dei dømde til å betale 3,75 millionar kroner i sakskostnadar. Gulating lagmannsrett har onsdag forkasta kravet om mellombels stans i deponeringa av gruveavfall. Miljøorganisasjonane krevde stans fram til hovudsaka skal behandlast i Høgsterett om to veker, men vann ikkje fram. Sjølv om organisasjonane tapte kravet om stans, fekk dei medhald i at utsleppsløyvet mest sannsynleg er ugyldig. Retten meiner løyvet bryt med både EUs vassdirektiv og den norske vassforskrifta. – At gruveselskapet får halde fram med å dumpe avfall, sjølv om retten slår fast at løyvet er ugyldig, viser kor svak beskyttelse naturen har i Noreg, seier Sigrid Hoddevik Losnegård, leiar i Natur og Ungdom. Truls Gulowsen, leiar i Naturvernforbundet, rettar blikket mot hovudsaka som startar i Høgsterett 27. april. Han meiner dagens vurdering frå lagmannsretten styrker sjansane deira der. – No blir det opp til dommarane i Høgsterett å bestemme utfallet. Vi trur dei kjem til å slå fast at utsleppsløyvet er ugyldig, seier Gulowsen. Også Sogn og Fjordane tingrett kom til same konklusjon om lovbrot i fjor haust, men heller ikkje då førte det til stans i drifta.