Ein 18-år gamal mann er fråteken førarkortet etter eit trafikkuhell på Fanafjellsvegen i Bergen. Det var like før midnatt at ein bebuar høyrde skrenselyd og smell sør for krysset Hamrevegen. Førar var åleine i bilen. Ingen airbag var utløyst, men bilen skal ha fått store materielle skader. Det er ikkje mistanke om alkoholpåverknad. – Bremsa kraftig i ein brå sving, og fekk sleng på bilen, opplyser operasjonsleiar Frode Kolltveit ved Vest politidistrikt. Bilførar vart dimittert etter ein kontroll av helsepersonell.

Brannvesenet har rykt ut til Rong etter melding om røykutvikling frå ein container. Det skal ikkje vere opne flammar, og containeren står fritt slik at det ikkje er fare for spreiing. Vaktkommandør ved 110-sentralen, Børre Brekkvassm, fortel at dei har skumma containeren har sløkt brannen. Brannvesenet er ferdige på stedet. Eieren er informert om hendelsen.

Ein mann som tysdag kveld blei pågripen etter å ha skote med pil og boge i eit bustadområde i Bergen, er no i ferd med å bli lauslaten. Politiet har gjennom dagen ransaka og avhøyrt mannen. Han har fram til no sete i arrest. – Etter avhøyr og vidare etterforsking er det vurdert at det ikkje er tilstrekkeleg grunnlag for varetektsfengsling, seier politiadvokat Katrine Thomassen i Vest politidistrikt. Mannen blir difor lauslaten i løpet av kvelden. Thomassen seier saka framleis blir etterforska, og at politiet seinare må ta stilling til om det skal takast ut tiltale. Det er ikkje meldt om skadde personar.

Brannvesenet har rykt ut etter at ein båt gjekk ned i Hattvika i Bjørnafjorden kommune onsdag. Det er meldt om oljesøl frå båten. Båten har gått ned, men heng etter fortøyningane, opplyser brannvesenet.

Det er sett av 100 millionar kroner meir til rassikring i forslaget til statsbudsjett. Nasjonal rassikringsgruppe, der representantar for ulike fylkeskommunar er med, er positiv til auken, men meiner samstundes det må mykje meir til. Gruppa peiker på at det reelle behovet er på kring 96 milliardar kroner, der kring to tredelar gjeld langs fylkesvegane. Nasjonal rassikringsgruppe krev difor ein opptrappingsplan for rassikring, og peiker på at rassikring også er viktig for beredskapen.

Ein mann er pågripen for å ha skote med pil og boge i nærleiken av ein barnehage i Åsane. Heime hjå mannen fann politiet fleire ulovlege og lovlege våpen, i tillegg til pil og boge. – Det er ikkje ein leikepil, seier politiadvokat Anne Mjelde Myhr. Hendinga skal ha skjedd i opningstida til barnehagen, men ingen personar skal ha vore til stades. Ingen skal ha blitt skadde. Mannen blei pågripen tysdag kveld og skal bli avhøyrt av politiet i løpet av onsdag.

Politiet melde onsdag føremiddag om ein mindre brann på BIR sitt anlegg i Blomsterdalen i Bergen. – Skal vere i samband med sortering av grovavfall, skriv Børre Brekkvassmo i brannvesenet. Brannen skal vere sløkt. Ein person er utsett for røyk, men framstår ok, opplyser politiet.

Tilskotet til Noregs Mållag blir kutta med 775.000 kroner i forslaget til statsbudsjett. Leiar i Noregs Mållag, Peder Lofnes Hauge, reagerer slik: – At Arbeidarpartiet skulle vere meir opptekne av skattelette enn nynorsk er berre ufatteleg, skriv han i ei pressemelding. Lofnes meiner regjeringa kastar blår i auga på Mållaget, norsk språkpolitikk og nynorskbrukarane.

NHO Vestland er skuffa over at regjeringa ikkje prioriterer skattelette til verksemder og eigarar. I ei pressemelding skriv regiondirektør Sondre Olsen at det er positivt at regjeringa senkar skattane for folk flest, men at fleire verksemder i Vestland seier marknadssituasjonen er dårleg, og at det er venta ei forverring i tida framover. Olsen meiner difor at det også burde kome skattelette til desse.

Byrådsleiar Chris Jørgen Rødland frå Høgre er ikkje nøgd med framlegget til statsbudsjett frå arbeidarpartiregjeringa. Rødland skriv at Bergen blir fattigare med dette budsjettforslaget. Han peiker mellom anna på at auken i frie inntekter til kommunane ikkje er stor nok. – Statsbudsjettet gjev kring 20 millionar i auka handlingsrom for Bergen, men berre den siste renteauken gav oss 30 millionar i auka utgifter, seier Rødland. Då budsjettforslaget for Bergen blei lagt fram i haust blei det mellom anna peikt på at renteutgiftene til kommunen er venta å stiga kraftig dei neste åra.

Regjeringa vil setta av pengar til eit verdsarvsenter ved Nærøyfjorden og Bryggen i Bergen. Det kjem fram i forslaget til statsbudsjett. Dette er dei einaste verdsarvstadene i Noreg som ikkje har eit eige senter i dag. Det er sett av fem millionar kroner til etablering av verdsarvsenter.

Stad skipstunnel får 1,05 milliardar kroner i 2027, ifølge regjeringas forslag til statsbudsjett. Beløpet er i tråd med kva Kystverket sa dei trong neste år. Regjeringa skriv at skipstunnelen vil føre til forseinka oppstart i andre planlagde samferdselsprosjekt, utan å spesifisere nærare. Arbeidarpartiet forsøkte å stanse skipstunnelen, men vart overkøyrt i Stortinget.

I forslaget til statsbudsjett skriv regjeringa at dei avventar å gje pengar til ny Fløyfjellstunnel på E39 i Bergen. Regjeringa peiker på at det framleis pågår arbeid med å avklara korleis Bybanen til Åsane skal sjå ut.

Ulike kulturbygg i Bergen får lite eller ingen pengar i forslaget til Statsbudsjett. Det er ikkje sett av pengar til Griegkvartalet, Kulturkvartalet Verftet eller Nye Fyllingsdalen Teater. Til Bergens Tidende seier kulturminister Lubna Jaffery at budsjettet er stramt, og at det ikkje er pengar til mykje. Det er heller ikkje sett av pengar til eit Jon Fosse-senter i Strandebarm.

Regjeringa vil setja av 80 millionar kroner til å pussa opp realfagsbygget og fysikkbygget ved Universitetet i Bergen. Det kjem fram av forslaget til statsbudsjett. Regjeringa skriv at Universitetet i Bergen har eit stort og viktig realfagsmiljø, og at det er viktig å rehabilitere bygget for å oppretthalde miljøet. Tidlegare i år sa regjeringa ja til å pussa opp realfagsbygget og fysikkbygget, i tillegg til eit nybygg, og no er det altså sett av pengar til dette. Byggeperioden vil vera frå 2030 til 2040, og heile prosjektet skal kosta kring 7,5 milliardar kroner, opplyser UiB.

Ein sogning i 30-åra må betale 16.400 kroner i bot og mister førarkortet i åtte månader etter å ha kjørt i 138 kilometer i timen i Dovre. Han trakka på gassen for å køyre forbi ein turistbuss som hadde køyrt sakte over fleire kilometer. Retten meiner handlinga skuldast ei kortvarig feilvurdering. Ei tilståing gjer at mannen slepp unna med 18 dagar fengsel på vilkår.

Statsforvaltaren i Vestland har opna eit stort tilsyn med Brakanes barne- og ungdomsskule i Ulvik. Det skriv Avisa Hordaland. Statsforvaltaren meiner skulen ikkje følger regelverket og seier læringsresultata i Ulvik har vore dårlege over lengre tid. – Vi har vore bekymra for læringsutbytet, og også bekymra for korleis skulemiljøet blir handtert på skulen, seier seksjonsleiar i Statsforvaltaren i Vestland, Mats Petter Sydengen, til avisa.