Brannvesenet har rykt ut til Rong etter melding om røykutvikling frå ein container. Det skal ikkje vere opne flammar, og containeren står fritt slik at det ikkje er fare for spreiing. Vaktkommandør ved 110-sentralen, Børre Brekkvassm, fortel at dei har skumma containeren har sløkt brannen. Brannvesenet er ferdige på stedet. Eieren er informert om hendelsen.

Ein mann som tysdag kveld blei pågripen etter å ha skote med pil og boge i eit bustadområde i Bergen, er no i ferd med å bli lauslaten. Politiet har gjennom dagen ransaka og avhøyrt mannen. Han har fram til no sete i arrest. – Etter avhøyr og vidare etterforsking er det vurdert at det ikkje er tilstrekkeleg grunnlag for varetektsfengsling, seier politiadvokat Katrine Thomassen i Vest politidistrikt. Mannen blir difor lauslaten i løpet av kvelden. Thomassen seier saka framleis blir etterforska, og at politiet seinare må ta stilling til om det skal takast ut tiltale. Det er ikkje meldt om skadde personar.

Politiet i Bergen har onsdag ettermiddag gjennomført ein aksjon der dei har undersøkt om folk har kniv eller andre farlege gjenstandar på seg. Aksjonen gjekk føre seg på Gyldenpris ved ein rusinstitusjon. Tre menn blir melde for bæring av kniv på offentleg stad.

Det er sett av 100 millionar kroner meir til rassikring i forslaget til statsbudsjett. Nasjonal rassikringsgruppe, der representantar for ulike fylkeskommunar er med, er positiv til auken, men meiner samstundes det må mykje meir til. Gruppa peiker på at det reelle behovet er på kring 96 milliardar kroner, der kring to tredelar gjeld langs fylkesvegane. Nasjonal rassikringsgruppe krev difor ein opptrappingsplan for rassikring, og peiker på at rassikring også er viktig for beredskapen.

Ein mann er pågripen for å ha skote med pil og boge i nærleiken av ein barnehage i Åsane. Heime hjå mannen fann politiet fleire ulovlege og lovlege våpen, i tillegg til pil og boge. – Det er ikkje ein leikepil, seier politiadvokat Anne Mjelde Myhr. Hendinga skal ha skjedd i opningstida til barnehagen, men ingen personar skal ha vore til stades. Ingen skal ha blitt skadde. Mannen blei pågripen tysdag kveld og skal bli avhøyrt av politiet i løpet av onsdag.

Politiet melde onsdag føremiddag om ein mindre brann på BIR sitt anlegg i Blomsterdalen i Bergen. – Skal vere i samband med sortering av grovavfall, skriv Børre Brekkvassmo i brannvesenet. Brannen skal vere sløkt. Ein person er utsett for røyk, men framstår ok, opplyser politiet.

NHO Vestland er skuffa over at regjeringa ikkje prioriterer skattelette til verksemder og eigarar. I ei pressemelding skriv regiondirektør Sondre Olsen at det er positivt at regjeringa senkar skattane for folk flest, men at fleire verksemder i Vestland seier marknadssituasjonen er dårleg, og at det er venta ei forverring i tida framover. Olsen meiner difor at det også burde kome skattelette til desse.

Byrådsleiar Chris Jørgen Rødland frå Høgre er ikkje nøgd med framlegget til statsbudsjett frå arbeidarpartiregjeringa. Rødland skriv at Bergen blir fattigare med dette budsjettforslaget. Han peiker mellom anna på at auken i frie inntekter til kommunane ikkje er stor nok. – Statsbudsjettet gjev kring 20 millionar i auka handlingsrom for Bergen, men berre den siste renteauken gav oss 30 millionar i auka utgifter, seier Rødland. Då budsjettforslaget for Bergen blei lagt fram i haust blei det mellom anna peikt på at renteutgiftene til kommunen er venta å stiga kraftig dei neste åra.

Regjeringa vil ikkje utbetra åtte tunnelar på E16 i Vestland. Det kjem fram i forslaget til statsbudsjett. Regjeringa peiker på at tunnelane over tid skal bli erstatta med nye vegstrekningar. Det gjeld seks tunnelar på strekninga Arna-Stanghelle og to på strekninga mellom Hylland i Aurland og Slæn i Voss herad.

Regjeringa vil setja av 80 millionar kroner til å pussa opp realfagsbygget og fysikkbygget ved Universitetet i Bergen. Det kjem fram av forslaget til statsbudsjett. Regjeringa skriv at Universitetet i Bergen har eit stort og viktig realfagsmiljø, og at det er viktig å rehabilitere bygget for å oppretthalde miljøet. Tidlegare i år sa regjeringa ja til å pussa opp realfagsbygget og fysikkbygget, i tillegg til eit nybygg, og no er det altså sett av pengar til dette. Byggeperioden vil vera frå 2030 til 2040, og heile prosjektet skal kosta kring 7,5 milliardar kroner, opplyser UiB.

Statsforvaltaren i Vestland har opna eit stort tilsyn med Brakanes barne- og ungdomsskule i Ulvik. Det skriv Avisa Hordaland. Statsforvaltaren meiner skulen ikkje følger regelverket og seier læringsresultata i Ulvik har vore dårlege over lengre tid. – Vi har vore bekymra for læringsutbytet, og også bekymra for korleis skulemiljøet blir handtert på skulen, seier seksjonsleiar i Statsforvaltaren i Vestland, Mats Petter Sydengen, til avisa.

I halv tre-tida natt til onsdag evakuerte kring 40 bebuarar då brannalarmen gjekk i eit leiligheitsbygg i Bergen sentrum. Årsaka viste seg å vere svidd mat. Bebuaren i den aktuelle leiligheita vart sjekka av helsepersonell på staden, og politiet har oppretta sak.

Ti personar evakuerte seg sjølve då det byrja å brenne i nokre leidningar på Dokken i natt. Ein mann i 20-åra som sløkte brannen med pulverapparat vart sjekka av ambulansepersonell etter å ha pusta inn røyk og pulver. Brannen vart meldt i halv to-tida. Under ein halvtime seinare fekk dei evakuerte returnere til bueiningane sine.

Ein mann i 20-åra er mistenkt for å køyrt bil i rusa tilstand i Førde. Mannen vart stoppa på riksveg 5 ved Hornnes like over midnatt. Politiet sikra seg blodprøve og tok beslag i førarkortet.