Ein mann som tysdag kveld blei pågripen etter å ha skote med pil og boge i eit bustadområde i Bergen, er no i ferd med å bli lauslaten. Politiet har gjennom dagen ransaka og avhøyrt mannen. Han har fram til no sete i arrest. – Etter avhøyr og vidare etterforsking er det vurdert at det ikkje er tilstrekkeleg grunnlag for varetektsfengsling, seier politiadvokat Katrine Thomassen i Vest politidistrikt. Mannen blir difor lauslaten i løpet av kvelden. Thomassen seier saka framleis blir etterforska, og at politiet seinare må ta stilling til om det skal takast ut tiltale. Det er ikkje meldt om skadde personar.

Brannvesenet har rykt ut etter at ein båt gjekk ned i Hattvika i Bjørnafjorden kommune onsdag. Det er meldt om oljesøl frå båten. Båten har gått ned, men heng etter fortøyningane, opplyser brannvesenet.

Ein mann er pågripen for å ha skote med pil og boge i nærleiken av ein barnehage i Åsane. Heime hjå mannen fann politiet fleire ulovlege og lovlege våpen, i tillegg til pil og boge. – Det er ikkje ein leikepil, seier politiadvokat Anne Mjelde Myhr. Hendinga skal ha skjedd i opningstida til barnehagen, men ingen personar skal ha vore til stades. Ingen skal ha blitt skadde. Mannen blei pågripen tysdag kveld og skal bli avhøyrt av politiet i løpet av onsdag.

Politiet melde onsdag føremiddag om ein mindre brann på BIR sitt anlegg i Blomsterdalen i Bergen. – Skal vere i samband med sortering av grovavfall, skriv Børre Brekkvassmo i brannvesenet. Brannen skal vere sløkt. Ein person er utsett for røyk, men framstår ok, opplyser politiet.

Tilskotet til Noregs Mållag blir kutta med 775.000 kroner i forslaget til statsbudsjett. Leiar i Noregs Mållag, Peder Lofnes Hauge, reagerer slik: – At Arbeidarpartiet skulle vere meir opptekne av skattelette enn nynorsk er berre ufatteleg, skriv han i ei pressemelding. Lofnes meiner regjeringa kastar blår i auga på Mållaget, norsk språkpolitikk og nynorskbrukarane.

Byrådsleiar Chris Jørgen Rødland frå Høgre er ikkje nøgd med framlegget til statsbudsjett frå arbeidarpartiregjeringa. Rødland skriv at Bergen blir fattigare med dette budsjettforslaget. Han peiker mellom anna på at auken i frie inntekter til kommunane ikkje er stor nok. – Statsbudsjettet gjev kring 20 millionar i auka handlingsrom for Bergen, men berre den siste renteauken gav oss 30 millionar i auka utgifter, seier Rødland. Då budsjettforslaget for Bergen blei lagt fram i haust blei det mellom anna peikt på at renteutgiftene til kommunen er venta å stiga kraftig dei neste åra.

Regjeringa vil setta av pengar til eit verdsarvsenter ved Nærøyfjorden og Bryggen i Bergen. Det kjem fram i forslaget til statsbudsjett. Dette er dei einaste verdsarvstadene i Noreg som ikkje har eit eige senter i dag. Det er sett av fem millionar kroner til etablering av verdsarvsenter.

Stad skipstunnel får 1,05 milliardar kroner i 2027, ifølge regjeringas forslag til statsbudsjett. Beløpet er i tråd med kva Kystverket sa dei trong neste år. Regjeringa skriv at skipstunnelen vil føre til forseinka oppstart i andre planlagde samferdselsprosjekt, utan å spesifisere nærare. Arbeidarpartiet forsøkte å stanse skipstunnelen, men vart overkøyrt i Stortinget.

Regjeringa vil ikkje utbetra åtte tunnelar på E16 i Vestland. Det kjem fram i forslaget til statsbudsjett. Regjeringa peiker på at tunnelane over tid skal bli erstatta med nye vegstrekningar. Det gjeld seks tunnelar på strekninga Arna-Stanghelle og to på strekninga mellom Hylland i Aurland og Slæn i Voss herad.

I forslaget til statsbudsjett skriv regjeringa at dei avventar å gje pengar til ny Fløyfjellstunnel på E39 i Bergen. Regjeringa peiker på at det framleis pågår arbeid med å avklara korleis Bybanen til Åsane skal sjå ut.

Regjeringa vil setja av 80 millionar kroner til å pussa opp realfagsbygget og fysikkbygget ved Universitetet i Bergen. Det kjem fram av forslaget til statsbudsjett. Regjeringa skriv at Universitetet i Bergen har eit stort og viktig realfagsmiljø, og at det er viktig å rehabilitere bygget for å oppretthalde miljøet. Tidlegare i år sa regjeringa ja til å pussa opp realfagsbygget og fysikkbygget, i tillegg til eit nybygg, og no er det altså sett av pengar til dette. Byggeperioden vil vera frå 2030 til 2040, og heile prosjektet skal kosta kring 7,5 milliardar kroner, opplyser UiB.

Statsforvaltaren i Vestland har opna eit stort tilsyn med Brakanes barne- og ungdomsskule i Ulvik. Det skriv Avisa Hordaland. Statsforvaltaren meiner skulen ikkje følger regelverket og seier læringsresultata i Ulvik har vore dårlege over lengre tid. – Vi har vore bekymra for læringsutbytet, og også bekymra for korleis skulemiljøet blir handtert på skulen, seier seksjonsleiar i Statsforvaltaren i Vestland, Mats Petter Sydengen, til avisa.