Politiet opprettar sak mot ein mann i 30-åra etter mistanke om køyring i ruspåverka tilstand. Mannen blir framstilt for blodprøve, skriv politiet. Politiet har mellombels kverrsett førarkortet til mannen.

Stabæk slo Sogndal 2–1 på Nye Nadderud. Dermed ligg Sogndal tredje sist på tabellen. Dette er fente strake kampen utan siger, der to av desse er tap. Kasper Skaanes skåra for Sogndal i starten av andre omgang. Jacob Hanstad skåra begge måla til Stabæk, eitt i begge omgangane. Neste serierunde for Sogndal er mot Raufoss på Fosshaugane søndag 4. oktober. Les kampreferat.

Eit mindre jordras går over E39 Jølstravegen ved Eikås, melder politiet. Ingen personar, bygningar eller bilar skal vere trefte. – Raset er ca. 10 meter breitt og ein meter høgt, opplyser operasjonsleiar Knut Dahl-Michelsen. Vegen er stengt som følge av hendinga. – Vi veit ikkje kor lenge. Det er ein del bilar som brukar den vegen, eg trur dei fleste køyrer rundt, seier Andreas Rasmussen i Vegvesenet.

Ein rusa mann i 20-åra måtte natt til søndag i drukkenskapsarresten for å ha laga bråk på ein utestad i Bergen. Mannen blei bortvist då han velta eit brett med alkohol. – I samband med det slo han til ei ordensvakt fleire gangar i ansiktet med flat hand, opplyser operasjonsleiar Morten Rebnord. Vektaren blei ikkje skadd. Mannen blir meld for ordensforstyrring og kroppskrenking.

På Oktoberfestivalen i Stryn lagde ein rusa mann bråk natt til søndag. Mannen skal ha vore fysisk utagerande og spytta mot ordensvaktar og andre festivaldeltakarar. Politiet tok mannen med seg til drukkenskapsarresten.

Natt til søndag blei to sjåførar tatt for ruskøyring i Bergen. Klokka 3.35 stansa politiet ein bil etter mistanke om køyring i rusa tilstand. Mannen hadde heller ikkje førarkort, opplyser politiet. Litt seinare, klokka 4.50, kontrollerte politiet ein bil kor ein kvinneleg førar var rusa. Ho fekk førarkortet beslaglagt.

Det er sett i verk ein redningsaksjon i Ullensvang etter ein mann som ikkje har kome tilbake frå tur, melder politiet. Det er dårleg dekning i området, og det er dårleg vêr, skriv Ingvild Teigland Tepstad, operasjonsleiar i Vest Politidistrikt. Politi og frivillige er på veg for å starte søk i området.

Ein person er vaken og blir tilsett av ambulansepersonell etter ei trafikkulukke på RV. 13. – Bilbergar er rekvirert og på veg, melder politiet. Bilen står på tvers i vegen. Ingen andre personar var involvert i hendinga.

Ein personbil har trilla utfor vegen i Bendixens vei i Bergen, melder brannvesenet. Dette er ikkje langt frå Brann Stadion. Føraren er ute av bilen, men bilen ligg på halv-åtte i ei skråning, ifylgje brannvesenet. Brannvesenet har reist ut for å sikre bilen.

Ungdommane som var nedkjølte i fjellet i Modalen er kome ned att. Det opplyser politiet. Det var fredag kveld at eit turfølge på ti personar blei sittande fast i fjellet, og det blei sett i gang ein redningsaksjon. To av dei i turfølget blei henta med helikopter, medan resten tok seg inn i ei hytte med hjelp frå frivillige. Politiet opplyser at desse laurdag føremiddag var på veg ned frå fjellet. – Det er ein krevjande tur, i tillegg er det ein som har fått problem med ein ankel og ein med eit kne, ifølge operasjonsleiar Knut Dahl-Michelsen. Klokka 14.27 oppdaterer politiet at alle i turfølget har kome fram til ein veg. Dei blir køyrt til Modalen kor dei skal få tilsyn av helse. – Dei er våte og kalde, opplyser Dahl-Michelsen.

14 lokale togavgangar i Vestland er innstilte måndag, grunna togstreiken. Det opplyser Vy på sine eigne nettsider. Seks avgangar på L4 Bergen–Arna og sju avgangar på R40 Bergen–Voss/Myrdal er innstilte. Togstreiken råkar òg fleire tog i helga. Laurdag er to avgangar er innstilte på den lokale strekninga mellom Bergen og Arna, medan på søndag er 18 avgangar innstilte på same strekning.

14 lokale togavgangar i Vestland er innstilte måndag, grunna togstreiken. Det opplyser Vy på sine eigne nettsider. Seks avgangar på L4 Bergen–Arna og sju avgangar på R40 Bergen–Voss/Myrdal er innstilte. Togstreiken råkar òg fleire tog i helga. Laurdag er to avgangar er innstilte på den lokale strekninga mellom Bergen og Arna, medan på søndag er 18 avgangar innstilte på same strekning.