Alvorlege avvik funne på Haukeland sjukehus
Bergen brannvesen avdekte fleire alvorlege avvik då dei gjennomførte tilsyn ved Haukeland universitetssjukehus i juni, det skriv BA. Mellom funna var rømmingsdører som ikkje lét seg opne fordi kapslar over dørvridarane var limte fast. Brannvesenet fann også fleire branndører med feil og manglar, manglande branntetting og manglar ved sjukehuset sine rutinar for branntryggleik. I tillegg peikar tilsynet på at sjukehuset mangla ei overordna og heilskapleg vurdering av brannrisikoen. Helse Bergen seier at dei tek funna på største alvor. – Pasientar, tilsette og besøkande skal vere trygge når dei oppheld seg på sjukehuset. Tilsynet har avdekt manglar knytte til branntryggleik som vi no følgjer opp med konkrete tiltak, seier driftsdirektør Morten Løkken Bendiksen til avisa. Fleire av avvika skal allereie vere retta opp, og sjukehuset opplyser at dei no arbeider med ytterlegare tiltak for å styrkje brannsikkerheita.
.png "FOTO: null")
.jpg "FOTO: Sandor Dahl")
